2020 - Песні в. Цяхцін (Бялыніцкі р-н) [інтэрнэт] - Аўдыё выданне - ЭТНАЎСЁ

::

2020 - Песні в. Цяхцін (Бялыніцкі р-н) [інтэрнэт]

Назва

Песні в. Цяхцін (Бялыніцкі р-н)

Віды носьбітаў

Змест

Вокладка

інтэрнэтаўтэнтычны фальклёрразмовыспевы

Статус

Дзе паслухаць

можна паслухаць

Апісанне

Гэтая складанка нарадзілася з пяшчоты да жанчын, якія і сёння жывуць у вёсцы Цяхцін, што ў Бялыніцкім раёне. Мы пазнаёміліся ў 2011 годзе. Тады, робячы запісы на просценькі дыктафон, я мала цяміла ў традыцыйным спеве, запісвала, бо раней такога не чула і разумела рэдкасць моманту. Мы правялі разам некалькі гадзін, было весела і ўтульна, бы ў кампаніі старых сяброў. Гэтыя людзі ўмеюць быць добрымі і шчырымі. Адчуваюць прыгожае і шануюць былое. Пераствараюць яго праўдзіва, дзеля радасці і нейкага агульнага парадку ў свеце.

У Цяхціне спявалі здаўна, а напрыканцы 80-х утварыўся вялікі спеўны гурт. Туды ўвайшлі жанчыны розных гадоў і прафесій, спявалі сваё, перанятае ад старэйшых сваякоў і аднавяскоўцаў. Сёння гурта няма. Але песні засталіся.

Асабліва хочацца расказаць пра Ефрасінню Максімаўну Буймістраву.

Маленькая жанчына, па-вулічнаму проста “Прося”, пражыла складанае жыццё: пасляваенная галеча, немагчымасць хадзіць у школу, бо “няма ў чым”, мары з’ехаць на цаліну. Потым было замужжа і чацвёра дзяцей. Ёй і сёння вельмі няпроста. Магчыма, спеў робіць гэтае быццё трошку больш радасным.

Ефрасіння Максімаўна спявае з дзяцінства, «што дзе чула – то і цягнула». За 9 год нашага знаёмства ад яе запісана больш за 150 песень: каляндарныя і сямейна-абрадавыя, бяседныя, рамансы, балады, прыпеўкі. Песні на любы выпадак жыцця і настрой.

У гэтай складанцы — тое, што падалося найбольш цікавым. Хацелася пазнаёміць слухачоў з рознымі жанрамі, напевамі і сюжэтамі адной вёскі. Тут знакамітая балада пра Цмока, рэдкі сюжэт лірніцкай песні пра святога Ляксея, цудоўныя ўзоры велічальных калядак, вясёлыя масленічныя «брахліўкі».

Спявалі: Ефрасіння Максімаўна Буймістрава, Тамара Мікалаеўна Хрушчова, Зінаіда Тарасаўна Цумарава, Галіна Цумарава.

Запісвалі: Марыя Варахоб, Алена Цумарава, Алесь Варахоб, Кастусь Канцавы, Ганна Сілівончык, Вольга Сямашка.

Запісы рабіліся ў розны час, у розных умовах, на розную тэхніку. Таму прадстаўленыя трэкі так розняцца па якасці. Даруйце за недасканаласці гуку.

Жанры песень, прывязанасць да свята ці падзеі, пазначаныя са слоў спявачак.

Прыемнага праслухоўвання!

Марыя Варахоб

Электроннае выданне падрыхтавана РМГА „Студэнцкае этнаграфічнае таварыства“.

Падрыхтоўка аўдыётрэкаў — Марыя Варахоб, тэксты песень — Марыя Варахоб, Аляксей Крукоўскі, вокладка — Яўген Барышнікаў.

Нумар у каталогу

BFA-004

Колькасць трэкаў фальклору

30.0000

Трэкліст

Пра Спевы
Разлілася вадзіца (веснавая)
Як пайду я па ваду (масленічная)
Я, я ў цябе адна (веснавая)
Пайшоў чарнец па ваду (масленічная)
Ой жылі людзі німаверныя (паставая)
Ішоў міленькі лужочкам, а я млода беражком (веснавы карагод)
Была ў бабкі курка-рабушка (велікодная)
Наварыў вірабей піва (мікольская, піўная)
Як была я молада, тады мяне муж любіў (мікольская, піўная)
Як паехаў Іван а на войну, на вайну (карагод)
Купала на Йвана, на вуліцы гоман-гоман (купальская)
Ой, Дунай, мой Дунай, Дунай ціхінькі (мікольская, піўная)
А гула пчолка гула (жніўная)
Мамачка мая, баліць галава (лесавая, ягадная)
Праду я, праду, спацячкі хачу (бяседная)
Асвяціў месіц і зямлю й ваду (калядная)
Жыў сабе чалавек Ахміёну (паставая, святая)
Пашла каліда калядуючы (калядная)
Ой па вуліцы сівы конь бяжыць (калядная)
Ай была ў мяне ні маць – мачыха (паставая)
Ай у заечкі а тры тропачкі (калядная)
Ня думай, Ганначка, ня думай(вясельная)
Ай, белая бярозачка ваду замуціла (бяседная)
Дайце вы, дзевычкі, помачы (вясельная)
Па саду галубок палятая (радзінная)
Люлі, люлі, пашлі каты ў дулі (калыханка)
Як табе, зорачка (вясельная)
А ні кукуй, а зязюлячка, рана (бяседная)
Горкая рэдзька ў гародзе (вясельная)

Трэкі1, 3, 5, 6, 8–11, 13–22, 24–28, 30 -Буймістрава Ефрасіння Максімаўна (1937)

Трэкі 2, 7, 12, 23, 29 запісаныя ад гурта ў складзе: Буймістрава Ефрасіння Максімаўна (1937),Цумарава Зінаіда Тарасаўна (1939), Хрушчова Тамара Мікалаеўна (1949), Галіна Цумарава (1958)

Дадатковыя спасылкі