Аўдыётэка → Аўдыё выданне:

СЭТ — Песні з экспедыцыі "Докшыцы-2012"

Перад вамі запісы, зробленыя падчас экспедыцыі "Студэнцкага этнаграфічнага таварыства" у Докшыцкі раён у жніўні 2012 года.

Удзельнікі экспедыцыі даследавалі большую частку Докшыцкага раёна, а таксама памежныя вёскі Вілейскага, Лагойскага і Мядзельскага раёнаў.

У складанку трапілі далёка не ўсе запісаныя песні. Прадстаўленае падалося найбольш паказальным і цікавым. Хацелася пазнаёміць слухача з прыгажосцю мясцовай спеўнай манеры, характэрнымі для рэгіёну ўзорамі абрадавых спеваў, хараством галасоў канкрэтных спявачак.

Большасць нашых спявачак нарадзіліся ў 1920-1930-х гадах 20 стагоддзя і ўсё жыццё пражылі на адным месцы. Нягледзячы на паважаны ўзрост, гэтыя жанчыны спяваюць па-майстэрску і з задавальненнем. Слухаючы іх сёння можна з упэўненасцю казаць, што перад намі апошняе пакаленне спявачак, для якія тутэйшая манера спеву і рэпертуар з'яўляюцца натуральнай часткай жыцця.

Запісы не проста выдатныя ўзоры рэгіянальнага спеву. Гэта своеасаблівыя дакументы, якія распавядаюць ўважліваму слухачу пра складаныя гістарычныя працэсы, што адбываліся на гэтых землях у 20 стагоддзі: падзел Беларусі на Заходняю і Ўсходняю, войны, асаблівасці суіснавання моў, рэлігій і культур.

Адным з натхняльнікаў і рухавікоў экспедыцыі быў Аляксей Лужынскі (Якуб Волат). Падчас выправы ён з асаблівай радасцю даследаваў свой родны Вілейскі раён. Дзякуючы Якубу мы маем шчасце слухаць многіх выдатных спявачак. Асабліва хочацца адзначыць спевы Ўладзіславы Сільвестраўны Савіцкай з вёскі Стахі.

1 сакавіка 2015 года Якуб заўчасна пайшоў з жыцця. Гэтую складанку мы прысвячаем памяці нашага дарагога сябра і паплечніка.

Запісы рабіліся ў палявых умовах. Просім прабачэння за гукавыя недасканаласці.

Матэрыялы экспедыцыі захоўваюцца ў архіве "Студэнцкага этнаграфічнага таварыства".

Выданне падрыхтавала Марыя Варахоб.

За дапамогу вялікі дзякуй Вользе Дзядовік.

Прыемнага праслухоўвання!