Калекцыя «Каляндарна-песенная традыцыя Беларускага Панямоння ў экспедыцыйна-палявых запісах Л. П. Касцюкавец» (аўтары-складальнікі Т. Канстанцінава, Н. Даніловіч) доўжыць, па-першае, «рэгіянальную» лінію серыі, па-другое, лінію, скіраваную на паказ рарытэтных экспедыцыйных запісаў аднаго збіральніка. У калекцыю ўваходзяць два кампакт-дыскі, складзеныя аўтарамі на аснове палявых аўдыяфіксацый Л. П. Касцюкавец.
Ларыса Піліпаўна Касцюкавец (1939–2014) — вядомы беларускі музыколаг, доктар мастацтвазнаўства, навуковая дзейнасць якога прысвечана распрацоўцы праблем гісторыі музыкі, музычнай фалькларыстыкі і медыевістыкі. Экспедыцыйнае даследаванне традыцыйнай музычнай культуры Беларусі — значны напрамак у яе шматграннай прафесійнай дзейнасці, якая ахоплівае паўстагоддзя (1965–2014 гг.).
Кіраўніком музычна-этнаграфічнай палявой практыкі студэнтаў Л. П. Касцюкавец няспынна з’яўлялася на працягу 43 гадоў — з 1972 да апошняга года жыцця (з 1989 г. нязменным асістэнтам, а з 2008 г. паўнавартасным сукіраўніком экспедыцый, якія ўзначальвала Л. П. Касцюкавец, з’яўлялася выпускніца яе спецкласа Лілія Фаільеўна Баранкевіч /Шамсутдзінава/).
За гэты час Касцюкавец было абследавана 66 раёнаў усіх абласцей Беларусі, дзвюх абласцей Расіі і дзвюх абласцей Украіны.
Пра зацікаўленасць даследчыцы ў вывучэнні этнамузычнай культуры Беларускага Панямоння сведчаць
шэсць маштабных экспедыцый, праведзеных пад яе кіраўніцтвам на гэтых тэрыторыях:
1978 г. — Гродзенскі, Іўеўскі, Навагрудскі раёны;
1983 г. — Зэльвенскі, Свіслацкі, Слонімскі раёны;
1987 г. — Ашмянскі і Смаргонскі раёны;
1991 г. — Мастоўскі і Шчучынскі раёны;
1992 г. — Іўеўскі, Воранаўскі і Навагрудскі раёны;
2011 г. — Астравецкі раён.
«Гродзенскі фоназбор» Л. П. Касцюкавец складаецца з узораў розных гісторыка-стылявых пластоў і дае магчымасць раскрыць асаблівасці этнамузычнага ландшафту значнай часткі заходнебеларускіх тэрыторый.
Для аўдыявыдання «Каляндарна-песенная традыцыя Беларускага Панямоння ў экспедыцыйна-палявых запісах Л. П. Касцюкавец», прысвечанага 80-годдзю са дня нараджэння даследчыцы, былі адабраны найбольш
рэпрэзентатыўныя гучанні, прыналежныя абрадавым спеўным практыкам гадавога земляробчага кола.
У СD 1 (30 трэкаў) уключаны старажытна-абрадавыя песенныя ўзоры і псальмы, прымеркаваныя да каляднага і велікоднага перыядаў, а таксама этнаграфічныя расказы і рацэі.У СD 2 (29 трэкаў) увайшлі строга прымеркаваныя песенныя ўзоры веснавога (юраўскія),
летняга (купальскія, жніўныя, дажыначныя) і восеньскага перыядаў, умоўна прымеркаваныя жніўная, пакосная і пастухоўская, этнаграфічная інфармацыя.
CD 1
CD 2
Выкладчык: Уладзімір Лобач
Аб’ём: 70 урокаў, 14 гадзін відэа, 127 тэставых пытанняў
Курс прапануе паглыбленае азнаямленне з этнічнай гісторыяй і этнакультурнай спецыфікай Беларусі. Прадстаўлены лекцыі па раздзелах і тэмах вучэбнай праграмы "Этнаграфія Беларусі", якая выкладаецца аўтарам у Полацкім дзяржаўным універсітэце.
Выкладчык: Зміцер Скварчэўскі
Аб’ём: 13 урокаў, 2 гадзіны відэа, 100 тэставых пытанняў
Сярод разнастайных аспектаў беларускай міфалогіі, прадметам курсу абраны персанажны код: боствы, духі, дэманічныя істоты, героі і т.п.
Каментароў — 0
Маеце пытанне ці заўвагу? Напішыце ў каментары. Звяртаем увагу, што каментары са спасылкамі і ад неаўтарызаваных аўтараў прэмадэруюцца.