Аўдыётэка → Аўдыё выданне:

Astroŭna — Месяц узышоў

Калядны альбом гурта ASTROŪNA "Месяц узышоў"

На Каляды мяжа паміж сусветамі празрыстая, бы срэбная тканіна завеі. Пад гукі завірухі ў гэтыя часіны ў сутонні і таямнічасці зноў ствараецца новы час – новы свет. У чароўную, святочную калядную ноч, калі навокал пануе суцэльная магія, прыслухайся, як падае снег – здолееш пачуць гэтую таемную музыку – кожная сняжынка мае свой голас, злятаючы долу звонкай нотай.

У момант нараджэння новага свету, на Каляды, спяваюць чароўныя калядныя песні, і пяюць ў іх пра казачныя падзеі, - дзеля таго, каб новаствораны свет адбыўся менавіта гэткім чынам: каб казка сталася новай рэчаіснасцю, каб усё надзвычайныя пажаданні, агучаныя ў песні, спраўдзіліся налета.

У межах гэтага альбома, прабіраючыся скрозь снегавыя гурбы, каляднікі з АСТРОЎНЫ, не мінаючы ніводнага двара, пяюць добрым людзям велічальныя песні пра калядныя цуды – і гаспадару, што роўны каралю, сядзіць на покуці ўвесь у золаце, і ягонай дачцэ, краснай панначцы ў пярловым венчыку і залатым паясе, і ягонаму сыну, адважнаму ваяру.

На Каляды свет зноў будзе цудоўным - народзіцца новае сонца, у небе заззяюць дробныя зорачкі і ўзыйдзе месяц!

Спяваюць і граюць:
Ганна Сілівончык - спеў
Паліна Курановіч - спеў, цымбалы, бубен
Кацярына Аракчэева - спеў, бёрды
Яраш Малішэўскі - спеў, дуда, корбавая лера, варган, дудкі, скрыпка, гуслі, мандаліна, гітара, акарыны, вуснавы гармонік, шархуны, сталькі, флейта, клавесін

Запрошаны музыка Піт Паўлаў - бубен у “Сізы арол”. Фота і дызайн - Міхась Аракчэеў. Батлейка - мастак Дзмітрый Гаралевіч.